Mwananchi kutoka Chanika aliwasilisha malalamiko ya kero ya ardhi akidai kuna uvunjaji horera wa makazi ya watu kwa kudai kuwa eneo lina umiliki wa mtu mmoja ambaye amekuwa akinyamaziwa na serikali ya mtaa. Jambo hili kila liliporipotiwa serikali za mtaa walikaa kimya na kuenea kwa maneno kuwa kuna viashiria vya rushwa. Baada ya jambo hili kuwa sugu kwa wananchi waliamua kuvunja ukimya na kutoa taarifa yenye malalamiko ya rushwa. Baada ya kupokea taarifa hii kutoka kwa wananchi hatua za haraka zilichukuliwa ikiwa ni pamoja na msaada wa maelekezo ya kufika ofisi ya TAKUKURU wilaya ya Temeke ili kueleza malalamiko hayo, aidha tulisaidia kutoa mawasiliano ya maafisa wa Takukuru Mkoa wa Kinondoni na Ilala. Baada ya msaada huo malalamiko ya wananchi yalisikilizwa na kufuatiliwa na suluhisho kupatikana kutoka Takukuru mkoa wa Temeke

Wananchi kutoka mtaa wa Kimeli, Mapinga, Bagamoyo waliwasilisha malalamiko yao kwa taasisi yetu wakiwa na madai ya kuwa nyumba za familia Zaidi ya 100 zilivunjwa na wengine wakipewa taarifa ya kuondoka eneo la makazi yao kwa madai kuwa eneo hilo ni mali ya mtu huyo aliyekuwa akivunja nyumba hizo. Baada ya kupokea taarifa hizi zilizodaiwa kuwa wananchi walilazimishwa kumlipa mtu huyo elfu kumi kwa kila 1m moja ya mraba ili kusalia kwenye eneo wanaloishi, tulishtuliwa na kuamua kufuatilia. Tulibaini kuwa jambo hili ni kweli lipo na viongozi wa mtaa walikuwa wakilisemea kwa Mkurugenzi na Mkuu wa wilaya bila mafanikio. Ushahidi Zaidi Wa malalamiko haya uliambatana na video za mahojiano ya wananchi na vyombo vya habari vya TBC na ITV ambao waliripoti kupitia taarifa zao za habari. Baada ya hayo tulichukua jukumu la kuwashauri kufika TAKUKURU ili kutoa taarifa na kisha tulichukua jukumu la kufuatilia kupitia wizara ya ardhi ambapo jambo hili lilimfikia Waziri wa ardhi Mhe. Jerry Silaa na kulitolea maelezo lishughulikiwe.

Wananchi wawili kwa nyakati tofauti waliwasilisha malalamiko yao kwetu wakiwa na uhitaji wa kusaidiwa katika migogoro ya ndoa iliyokuwa ikiwakabili wakidai kuonewa kimaamuzi na wenza wao wa kiume hasa kwenya eneo la kuishi na watoto wao. Mmoja wa walalamikaji hakuwahi kufungua mashtaka kwa mamlaka yoyote yenye kusimamia masuala ya ndoa na malezi. Hivyo tulimshauri kwenda ustawi wa jamii na kufika wizara ya katiba na sheria kupata ushauri wa kisheria na msaada Zaidi. Mwingine alikuwa tayari ameshughulikia suala lake kwa mamlaka kadhaa lakini hakuwa ameridhishwa na maamuzi yaliyokuwa yametolewa na mahakama. Baada ya kumsikiliza na kupitia ushahidi wa nyaraka alizowasilisha kwetu tulimshauri kurudi ustawi wa jamii, kama hatoweza kupata msaada Zaidi tutamsaidia kufika tume ya mashtaka ya taifa na wizara ya katiba na sheria kwa msaada Zaidi. Jambo hili tulilifanikisha pia na kupata majibu mazuri kutoka kwa mlalamikaji.

Mwananchi mmoja kutoka Nyankumbu, Geita alipiga simu akitoa taarifa ya ndugu yake aliyepotea katika kijiji cha Katale, Chato na kudai kuwa walifika kwa Mjumbe wa mtaa kuomba ushirikiano akawaeleza wafike kwa Mwenyekiti wa mtaa, baada ya kufika kwa Mwenyekiti naye aliwaeleza jambo hilo liko nje ya uwezo wake wanapaswa kufika kituo cha polisi. Baada ya kufika kituo cha polisi Buzilayombo walipokelewa na askari aliyekuwa zamu aliwajibu kuwa “kabla hamjafika hapa nilipigiwa simu na kuambiwa mnamtafuta ndugu yenu, rudini nyumbani atarudi huyo atakuwa amekwenda kutafuta” ndugu hawa hawakuridhishwa na majibu ya askari huyo na kuamua kumuuliza wafanye nini lakini yeye aliwajibu , “Sitaki maswali nimekwisha kuwaeleza” Baada ya suala hili kuwa gumu likiashiria shida katika utatuzi wake kutokana na maelezo ya yule aliyekuwa akiishi na mtu aliyepotea na kuzingatia matumizi ya kikabila ambacho watafutaji walikuwa hawakielewi kati ya mlalamikiwa na viongozi wa mtaa, ndugu hao walichukua jukumu la kupiga simu kwetu na kuomba msaada wakiamini kuna viashiria vya rushwa. Baada ya kufuatilia ukweli wa jambo hili tulibaini waliyoeleza yana ukweli na hivyo tulichukua jukumu la kumtafuta Mkuu wa kituo cha polisi Buzilayombo na kumweleza kilichotokea kati ya ndugu wa aliyepotea na askari aliyewahudumia ili kupata ufumbuzi. Mkuu wa kituo alilipokea na kutuomba tuwaeleze warudi kituoni ili kuwahudumia kwa taratibu za kiofisi. Tuliwataarifu ndugu hao na wakafika kituoni na kukutana na Mkuu wa kituo na kuwahudumia ikiwa ni kufanya nao mahojiano kisha kuamua kuwapa RB inayowawezesha kupata kibali cha kumtafuta ndugu yao na kuanza taratibu za kumfuatilia ndani ya siku 14. Ndugu waliturejeshea majibu hayo nasi tukajiridhisha kwa jambo hilo ambalo linaendelea kushughulikiwa.

Mtu mmoja alipiga simu akieleza kuwa kuna bajaji ya familia ambayo dereva aliporwa na wezi usiku na kutokomea nayo kusiko julikana, baada ya kufuatilia tukio hilo la wizi bajaji ilionekana kuwa ipo Maeneo ya Mkata njia panda ya Tanga – Dar es salaam na wao ni wakazi wa Dar es salaam hivyo wanaomba msaada wa jeshi la polisi ili waweze kusaidiwa kushikilia bajaji hiyo. Baada ya maelezo hayo na kwa kuwa taasisi yetu siyo jeshi la polisi tuliwasaidia kwa kuwapa namba ya Kamanda wa Polisi Mkoa wa Tanga ambaye kwa mawasiliano aliwasaidia askari na mawasiliano ili awasaidie na wao wakawasiliana naye. Juhudi hizi zilizaa matunda na mwizi kukamatwa kisha walalamikaji walijulishwa kufika kituoni ambako mrtuhumiwa alishikiriwa wakiwa na askari kutoka Dar es salaam ambako walichukua RB, jambo hili lilifanyika kwa wao kufika kituo kidogo cha polisi Temboni kuwajulisha kuwa wanaomba askari kumfuata mtuhumiwa na kituo kidogo wakawaeleza wafike kituo kikubwa cha Wilaya Gogoni ili kupata msaada Zaidi. Baada ya kufika huko walipewa taratibu za kufuata na kupewa askari wa kumfuata mtuhumiwa ambaye waliambatana naye kisha kumchukua mtuhumiwa na kurudi naye jijini Dar es salaam kituo kikubwa cha Gogoni ambako RB na kesi ilikuwa imefunguliwa. Baada ya kufika hapo taratibu za kisheria zilifuatwa na suala hili kukamilika.